Syair Aceh - Medya Hus, BEUDOH IBADAT

BEUDOH IBADAT

Syair : Medya Hus

Wahe kawom lon umat islam
Inong ngon agam beudoh tataubat
Tabeudoh jinoe tapujoe Tuhan
Uro ngon malam bekroh lam sisat

Buet-beut keleupah nyang takerjakan
Dosa ngon Tuhan kadang leupah brat
Beuta seusai droe bak ajaran
Peudoman Qur'an keu bandum umat

Di ureueng inong nyan na salahan
Kadang meujan-jan na tameu upat
Deuk dua lhee droe laloe poh rantam
Hana tatujan keugop tahujat

Meujan sigo-go ngon lakoe keujam
Kadang meujan-jan keleumah aurat
Kadang roh teusok bajee deuh badan
Sileuwue panyang pih leupah keutat

Kadang roh tajak bak na piasan
Karoh takalon buet-buet nyang sisat
Kadang roh ta-eu Film teulanjang
Beudoh beurijang laju tataubat

Deungon ie mata lakee bak Tuhan
Bek tariwang nyo ka tataubat
Keubuet nyang kalheueh oh lheueh sembahyang
lakee amponan nibak Hazarat

Meunan cit teuma di ureueng agam
Kadang meujan-jan pihka roh silap
Judi ngon buntut na takerjakan
Lakee amponan do'a ngon taubat

Dalam buet dosa na takerjakan
Zina, cacian hareuem takarat
Kajeuet tatingai jalan nyang hitam
Jinoe tariwang bak jalan teupat

Beudoh wareh lon inong ngon agam
Ban suroh Tuhan beuna taingat
Beudoh ibadat yoh sihat badan
Uroe kemudian meuteumee rahmat.

Syair Aceh - Medya Hus, BEUDOH IBADAT

Syair adalah jenis puisi lama yang tiap-tiap bait terdiri atas empat larik (baris) yang berakhir dengan bunyi yang sama. Syair digunakan untuk melukiskan hal-hal yang panjang misalnya tentang suatu cerita, nasihat, agama, cinta, dan lain-lain.