Wate Ban Lahe Rasul Mulia - Teks Ca'e Aceh
Assalamu'alaikum salem awalan,
pijoe pujian Allah nyang agoeng.
Seulaweut saleum keu Muhammadan,
Al-sahbah insan saleum nyang lamboeng.
-
Horeumat meubi bagi keurakan,
Guree keunarang saleum nyang santoen.
Man 4 wilayah ilah jamakkan,
Saleum sipadan keu manduem kawoem.
-
Mohoen neu idien sidiem berjalan,
ujoe keunarang rangkai seuneutron.
Moga meuhase akhe tujuan,
Muda mudahan bek na nyang siroeng.
-
Teuntra abrahah reubah masanyan,
Ababil datang ba bate tutoeng.
Peurhoet uwateuh suroeh le tuhan,
musoeh neuyue prang ancoe lam gampoeng.
-
Apui Majusi dali ka padam,
Apui keu Tuhan pateh nyan kawoem.
Lahernya Nabi Rabbi sampaikan,
sengue hana ban kuta ngoen dusoen.
-
Tanggai dua blah jeulah teupampang,
Rabi'ul bulan tente nibak phoen.
Lahernya sidro keumudoe alam,
sidroe janjongan seluroh kawoem.
-
Diteuka beungoeh suboeh ban jelang,
tuboeh janjongan mube than haroem.
Peungeuh seumulhoeh ban saboeh alam,
sampoe nanggroe syam wahe rakan loen.
-
Dipintoe langet teubuka rijang.
Mangat teupandang seugala kawoem.
Di malaikat lenkap senangan,
Burak nibak sang keunan beu jitroen.
-
Siti Aiensyah serta Mariam,
Perintah Tuhan masa nyan kunjoeng.
Peusaneut Nabi neubri pakaian,
Peuneutop badan Rasul neu junjoeng.
-
Ban abu Lahap cakap le rijang,
Hate that seunang kumuen na iloen.
Gata suwaibah bagah berjalan,
Merdeka rijang lepas bak ampoen.
-
Sampoe meuninggai ajai bak tuhan,
abu lahap nyan seunin pre hukoem.
Yoeh masa hudep sulet hana ban,
Keu Muhammadan bantah nyang keu phoen.
-
Allah peu yakien seunin peu rinngan
saweub neuseunang lahe badeuron
Siduemnan dali neubri le rijang,
balah bajikan ka uleh Rabbon.
-
Al-mukarramah leumah nibak nyan,
Lam kejadian hantoem meu keuphoen.
Lhe rutoeh nam ploeh patoeng di dalam,
Reubah meuhantam hancoe sineuoen.
-
Abdul mutalleb sabet masa nyan,
Sinan di dalam ka tahe ganteong.
Tamah teukeujoet tueot sang goyang,
putra jadian meunoe jeut lakoem.
-
Meusjied peut sagoe ujoe ucapan,
keu Muhammadan kata neusanjoeng.
Meusuoet samboet leumboet hana ban,
Teukeudi Tuhan Allah hurabboen.
-
Abdul Mutalleb neuwet le rijang,
aminah dalam jak saweu kandong,
Bak pintoe rumoeh leumoh le badan,
leupi fikiran aman lam jantoeng.
-
Meuban neutamoeng keunoeng pandangan,
cucoe neuh agam seunang meusamboeng,
Neucoek neu guboe ujoe ba sajan,
U mesjied rijang neuputoe langsong,
-
Disampeng Kakbah tawaf mulaan,
Tujoeh sikarang neuputa ampoen.
salam'alaika sigra neu kalam,
disampeng makam ibrahiem agoeng.
-
Meuhat seuleusoe dudoe keunarang,
Meuah oe rakan kadang na siroeng.
Calitra nabi loen cie bawakan,
Ban kejadian keunoe meusuoen.
-
uloen meurunoe ujoe fikiran,
baroe mulaan nibak hai panton,
et noe seutior meu undoer badan,
akhe wassalam hormat keu kawoem.
 |
| Wate Ban Lahe Rasul Mulia - Teks Ca'e Aceh |
