Subhanallah Wabihamdihi
Fatimah Siti Aneuk Maulana
Masa Goeh Wafeut Ya Rasulullah
Kalheuh Neupeugah Wafeut Aneuk Da
Dilikoet Goebnyan Siti Fatimah
Bak Asoe Rumoeh Mula Pertama
Alhamdulillah Wabihamdihi
Wafeut Siti Uloen Calitra
Yoeh Wafeut Nabi Meuguncang A’rasy
Wafeut Fatimah Meuguncang Doenya
Tinggai Ngoen Aneuk Hasan Ngoen Husein
Syiet Hana Laen Agam Mandua
Tinggai Aneuk Sajan Ngoen Lakoe
Hana Meusidroe Nibak Saudara
Nam Boeh Aneuk Nibak Khadijah
Kasem Abdullah Agam Mandua
Ibrahim Teuma Bak Ti Mariyah
Ban Lhee Ka Sudah Wafeut Ka Lama
Teuma Yang Inoeng Phoen Fatimah
Zainab Rukaiyah Seuleumueng Dua
Di Ummi Kalsum Teuma Yang Tuloet
Zainab Masa Cuet Meninggai Doenya
Ali Meukawen Deungoen Fatimah
Masa Di Mekkah Gohlom Neubungka
Usman Meukawen Deungoen Rukaiyah
Pih Chit Di Mekkah Tanoeh Mulia
Hana Trep lheuh Nyan Wafeut Rukaiyah
Nabi Peunikah Kali Kedua
Geupulang Balee Ngoen Ummi Kalsum
Hana Padum Thoen Wafeut Lom Teuma
Tinggai Fatimah Laen Hana Lee
Aneuk Boeh Hatee Sayyidil Ambiya
Lheuh Wafeut Nabi Teuma Lee Dudoe
Nam Buleun Sampoe Fatimah Zuhra
Dua Boeh Aneuk Cuet Puteh Licen
Hasan Ngoen Husein Ubit Goeh Raya
Aneuk Di Ali Bak Inoeng Laen
Hana Ee Polem Uloen Calitra
Uroe Keu Siblah Buleun Ramadhan
Nibak Seupoet Nyan Wate Lheuh ' Asa
Geucok Ngoen Tiema Neuba Deungoen Ie
Chiet Meunan Sabe Dilee Koen Yang Ka
Geuhei Le Aneuk Laju Geupeutoe
Meusigoe Sigoe Teuka Mandua
Neudoeng Di Aneuk Di Ateuh Batee
Neu Plee Di Ulee Peu Basah Muka
Di Aneuk Tuha Geumanoe Keudroe
Teuma Di Adoe Mantoeng Buet Poema
Di Phoen Di Ulee Sampoe U Gaki
Mandua Neu Lilie Jeut-Jeut Anggota
Dang Neu Uet Tuboeh Aneuk Boeh Hate
Sajan Ka Ilee Deungoen Ie Mata
Aneuk Ka Tahee Aduen Ngoen Adoe
Neungieng Poema Droe Tijoh Ie Mata
Aneuk Yang Tuha Geutanyoeng Meunoe
Pakoen Bunda Droe Geu Rhoe Ie Mata
Yang Ka U Likoet Jan Manoe Kamoe
Hantoem Lagee Nyoe Pakoen Ee Bunda
Laju Neujaweub Aneuk Boeh Hate
Singeh Hana Lee Peumanoe Gata
Sang -Sang Jan Laen Aneuk Hana Lee
Meunan Dalam Se Leumah Bak Poema
Uloen Ee Aneuk Sang Katoe Mate
Sayang Boeh Hate Mandua Gata
Gata Mantoeng Cuet Aneuk Boeh Hate
Hana Saboeh Lee Ureung Useuha
Saudara Diloen Mandum Ka Tan Lee
Ka Habeh Meucree Ngoen Doenya Fana
Seubab Keunan Roet Aneuk Loen Pike
Yang Keuh Jeut Ilee Deungoen Ie Mata
Kadang Jan Saket Mumang Lam Ulee
Hana Saboeh Thee Di Ateuh Tika
Hasan Ngoen Husein Di Ateuh Batee
Neucoek Neupangke Neucoem Neuwawa
Aneuk Boeh Hate Aneuk Meutuwah
Peulara Allah Gata Mandua
Neucoek Lee Aneuk Peu Ek Bak Teumpat
Uroe Ka Jiloep Buka Puasa
Uroe Keu Siblah Malam Dua Blah
O’eh Teu lheuh Sudah Buka Puasa
Neusoek Teuleukoem Sembahyang Meugreb
Sunat Ngoen Wajeb Renggang Hana Bla
O’eh Lheuh Saleum Tamoeng Lam Rateb
Beungoeh Ngoen Seupoet Tiep-Tiep Kutika
Suloeh Yang Akhe Sabe Neubeudoeh
O’eh Teu Lheuh Suboeh Lee Macam Neuba
Neubeut Quru’an Neukheun Seulaweut
Zikir Geuseubut Bermacam Rupa
Lagee Ka neuyue Lee Rasulullah
Hana Neu Ubah Tiep-Tiep Kutika
Nibak Malam Nyan Teungoeh Lam Rateb
Jie Teuka Saket Ngoen Tiba-Tiba
Teungoeh Meuzikir Geu Seubut Allah
Lam Murakabah Ateuh Mushalla
Neu Peunyum-Peunyum Tuboeh Neuh Saket
Neu Peusep Rateb Dalam Mushalla
Seulaweut Pih lheuh Meutamah Saket
Fatimah Maried Deungoen Aneuk Da
Geutawoek Aneuk Mandua Sigoe
Adun Ngoen Adoe Laju Le Teuka
Neukheun Bak Aneuk Sajan Yue Cupet
Bunda Ka Saket Hai Bijeh Mata
Uloen Hai Aneuk Malam Nyoe Wafeut
Gata Mantoeng Cuet Loen Paban Teuma
Gata Ubiet-Biet Poema Hana Lee
Aneuk Boeh Hate Kameunan Qada
Uloen Terpanggil Bak Rahmat Allah
Gata Bek Susah Hai Bijeh Mata
Gata Loen Seurah Ban Hukoem Allah
Meuduek Ngoen Ayah Siat Dang Raya
Rahasia Bak Loen Aneuk Kaleumah
Ya Rasulullah Bunoe Neuteuka
Geupeugah Bak Loen Geuyue Meukeumah
Janji Bak Allah Katroek Kutika
Uloen Kaneujak Tueng Lee Rasulullah
Hanjeut Ta ubah Meusiklep Mata
Gata Ee Aneuk Loen Tinggai Siat
Meunan Amanah Rasul Ambiya
Beu Lee Seulaweut Keu Rasulullah
Keu Ma Ngoen Ayah Beu Lee That Do’a
Gata Hai Aneuk Loen Seurah Bak Allah
Dang-Dang Meutuwah Ta Seutoet Poema
O’eh Ban Geudengoe Peusan di Ibu
Masa Nyan Laju Peukalom Rongga
Bunoe Yoeh Seupoet Pih Kalheuh Sigoe
Watee Bak Manoe Meugreb Rap Teuka
Wahe Hai Bunda Pakri Boeh Hate
So Kalen Tanlee Kamoe Nyoe Dua
O’eh Hana Bunda Hana Meusampe
Dak Jitem Bahlee Sigee Tagisa
O’eh Tanlee Bunda Hana So Papah
Adak Na Ayah Han Jitem Sama
Karena Ayah Leupah Tiep Uroe
Sibuleun Lhee Goe Meukalen Rupa
Tapajoeh Beungoh Sampoe Cot Uroe
Di Dalam Deuk Troe Makanan Goeh Na
O’eh Ban Neu Deungoe Aneuk Kheun Meunan
Fatimah Yoeh Nyan Tijoeh Ie Mata
Gata Hai Aneuk Ban Hukom Allah
Di Rasulullah Keu Chiek Di Gata
Yatim Lam Kandoeng Ka Tan Lee Ayah
Jeut Geuplueng Bagah Ka Tan Lee Poma
Tuhan Peulihara Aneuk Bek Gundah
Milek Di Allah Tuboeh Ngoen Nyawa
Wahee Boeh Hate Cuet Puteh Licen
Bek Lee Tameusyen Aneuk Keu Bunda
Tameu Duek Siat Ngoen Bunda Laen
Dangdang Meukawen Mandua Gata
Bek That Ta Galak Keu Doenya Zhalem
Seubab Na Laen Nanggroe Bahgia
Dangdang Chiet Tawoe Keudeh Bak Allah
Ya Rasulullah Pih Geupreh Gata
Bak Doenya Fana Bacuet Faedah
Han Peu That Leupah Keujih Tahawa
Nanggroe Bahagia Keu hamba Allah
Ngoen Rasulullah Tamoeng Syuruga
Meunye Wafeut Loen Aneuk Meutuwah
Sajan Ngoen Ayah Peumanoe Bunda
Gata Uet Tuboeh Deungoen Peusuci
Deungoen Sigra Lee Bek Ta Peujula
Lagee Neuwasit Lee Rasulullah
Peugah Bak Ayah Ali Murtadha
Seubab Bak Ayah Pih Ka Neuwasiet
Masa Goeh Wafeut Sayyidil Ambiya
Pat Geuyue Tanoem Lee Rasulullah
Tanyoeng Bak Ayah Ee Bijeh Mata
Pakrie Yang Wasiet Nibak Pang Ulee
Masa Yoeh Dilee Bak Ayah Gata
Sayyidina Ali Nibak Seupoet Nyan
Hana Meusajan Buka Puasa
Sayyidina Ali Nibak Meuseujid
O’eh Teu Lheuh Meugreb Neupreh Dang Isya
Sayyidina Ali Dalam Watee Nyan
Hate Tan Seunang Laju Neugisa
Hatee Di Ali Meutampoe-Tampoe
Neu Beudoeh Geuwoe Laju Neugisa
O’eh Troek U Rumoeh Ali Ka Neuwoe
Laju Neu Peutoe Nibak Aneuk Da
Ubak Fatimah Ali Neu Tamoeng
Neukaloen Bagoe Fatimah Zuhra
Ali Neukaloen Fatimah Saket
Laju Meurhep-Rhep Deungoen Ie Mata
Seubab Teu Ingat Keu Wasiet Nabi
Geu Peugah Siti Buleun Puasa
Lheuh Wafeut Uloen Kheun Rasulullah
Siti Fatimah Dilikoet Hamba
Ali Lee Neuduek Sajan Fatimah
Aneuk Dua Boeh Di Uneun Poema
Ali Neu Tanyoeng Pajan Phoen Saket
Neu Mat Neucupet Sapai Mandua
Neupeugah Rijang Bunoe Yoeh Meugreb
Teungoeh Loen Rateb Leumoeh Anggota
Seuluroeh Tuboeh Mandum Anggota
Jaroe Loen Peujak Hana Le Rasa
Langkah Loen Habeh Deungoen Reuseuki
Aneuk Ngoen Ali Tinggai Mandua
Katroeh Kutika Jeumba Bak Rabbi
Loen Seutot Nabi Sayyidul Ambiya
Malam nyoe Tinggai Judoe Pahlawan
Loen Woe Bak Tuhan Bak Rabbul A’la
Malam Nyoe Tinggai Hasan Ngoen Husein
Teuma Lom Laen Ureung Dilingka
Loen Tinggai Mandum Ahli Lam Rumoeh
Tinggai Peurumoeh Sayyidul Ambiya
U Padang Mahsyar Meureumpek Singoeh
Bak Sigoe Teungoeh Yup Payoeng Nabi
Uloen Geujak Tueng Lee Malaikat
Loen Tinggai Sahbat Kawoem Wanita
Ee Ya Tuhanku Neubri Seulamat
Umat Muhammad Agam Ngoen Dara
Deungoen Sahbat Peut Mandum Bek jieoeh
Neubri Beu Tanggoeh Peukoeng Agama
Doenya Akhirat Bak Saboeh Lampoeh
Bak Sapat Piyoeh Yub Payoeng Raya
Iman Iseulam Mandum Bak Kukoeh
Tapeukoeng Sa Oeh Bek Pura-Pura
Teumpat Dua Pat Teuma Bak Piyoeh
Bak Tuhan Peutroeh Bak Cita-Cita
Liwaul Hamdi Leumah Di Jioeh
Teumpat Bak Piyoeh Lam Uroe Kha
Yang Tanggoeh Iman Keunan Peuniyoeh
Allah Tuhan Beh Tuloeng Dum Hamba
Loen Tinggai Dusoen Nanggroe Madinah
Ka Uloen Minah Didalam Doenya
Doenya Yang Fana Bak Saboeh Watee
Keudeh Yang Teuntee Mandum Meugisa
Loen Tinggai Judoe Ngoen Hasan Husein
Keudeh Bak Meuchen Yub Payoeng Raya
Keudeh Meureumpoek Bak Meukhak-Meukhem
Keudeh Bak Meuchen Aneuk Deungoen Ma
O’eh Di Yub Payoeng Bak Ulee Titie
Bak Kulam Nabi Ta Meungieng Teuma
Bate Di Pantee Pudoe Ngoen Intan
Aloen Geulumbang Suara Bangsa
Tujoeh Wareuna Ie Dalam Kulam
Mandum Geulumbang Dipujoe Rabbi
Riyeuk Meu Aloen Suara Macam
Tujoeh ribee thoen Sang-Sang Seuhari
Di Bineh Pantee Macam Tanaman
Yang Katroeh Keunan Mandum That Suka
Dalam Syuruga Teumpat Birahi
Judoe Ngoen Ali Bak Meugieb Muda
Bak Doenya Sinoe Makanan Basi
Pane Birahi Teunaga Hana
Loen Tinggai Judoe Pahlawan Gagah
Loen Seutoet Ayah Sayyidul Ambiya
Loen Seutoet Rasul Pang Ulee Ummat
Keudeuh Keuh Teumpat Meurempoek Teuma
Aneuk Loen Dua Tinggai Ngoen Ali
Beujroeh Neutem Brie Keu Jieh Neujaga
Beu That Neugaseh Keu Hasan Husein
Bak Leubeh Meusyen Aneuk Hana Ma
Beu That Na Aneuk Bak Inoeng Laen
Bak Leubeh Meusyen Aneuk Hana Ma
Adak Neupeduek Bak Ma Yang Laen
Bak Galak Neutem Mentui Hana Ma
Bak Na Neumalee Keu Rasulullah
Cucoe Geukeubah Beu Get Neujaga
Teuma Lagi Lom Wahee Ee Ali
Uloen Coem Gaki Neu Ampoen Dosa
Hana Yang Zhahir Kadang Yang Batein
Kadang Pat Laen Hatee Tan Ridha
Hanjeut Han Teupeh Aweuk Ngoen Ringkan
Geutanyoe Insan Wajeb Na Lupa
Ali Neujaweub Judoe Meutuwah
Alhamdulillah Ngoen Loen Tan Dosa
Uloen Keu Gata Yang Na Meu Salah
Ka Roeh Loen Peugah Dilee Yang Hana
Masa Ta Mariet Gata Ngoen Peudeung
Loen Sangka Ureung Tasoem Lee Gata
Meu'ah Dosa Loen Dilee Ka Seureing
Nibak Peu Mandum Dalam Ngoen Luwa
Fatimah Seu Oet Wahee ee Ali
Hana Uloen Brie Keudroe Meu Dosa
Hana Patoet Moe Bak Ureung Binoe
Keu Ureung Lakoe Geubri Meudosa
Fatimah Pih Lom Mariet Ngoen Aneuk
Teungoeh Neugusuk Di Ateuh Boeh Pha
Meu'ah Keu Bunda Aneuk Boeh Hate
Bathen Ngoen Lahee Mandua Gata
Masa Loen Tingkue Loen Peu Ek Peutroen
Masa Lam Ayoen Loen Peu Eh Gata
Kadang Meuseumpom Bak loen Lhoem Ulee
Bunda Tan Geuthee Ka Saket Gata
Kadang Meuseupet Jampang Loen Pangkee
Poema Tan Geuthee Mudharat Gata
Kadang Meuseumpom Bak Loen Lhoem Ayoen
Meu’ah Keu Uloen Bandua Gata
Kadang Bak Loen Coek Didalam Ayoen
Teukloek Jaroe Loen Bak Badan Gata
Bak Loen Peumanoe Beungoh Ngoen Seupoet
Kadang Ie Jiloeb Geulinyueng Gata
Bak Uloen Plee Ie Di Ateuh Badan
Kadang Meujantang Ngoen Taloe Tima
Kadang Jan Teulat Loen Boeh Makanan
Laen Nibak Nyan Uloen Dhoet Gata
Kadang Di Bunda Keudroe Dang Siboek
Gata Teumawoek Loen Deungoe Hana
Meu’ah Keu Bunda Aneuk Boeh Hatee
Supaya Bek Le Na Soal Di Mahsyar
Aneuk Mandua Meu Rasa Ka Reulhoeh
Seubab Geu Teuoeh Goebnyan Meudosa
Laen Pih Lee Lom Fatimah Wasiet
Ali Meu Reb-Reb Sajan Ie Mata
Ali Neu Angkee Wasiet Fatimah
Mandum Amanah Ali Neu Ridha
Bak Akhee Nariet Siti Fatimah
La ilaha illallah Peunutoep Kalam
Teuma Lee Laju Bungoeng Mangat Bhee
Layoeh Ngoen Layee Bungong Syuruga
Teutoep Ngoen Babah Lidah Ngoen Langet
Jaroe Teuduek Get Di Ateuh Dada
Aneuk Ngoen Ali Ban Lhee Meusajan
Seulamat Jalan Bungoeng Syuruga
Wafeut Fatimah Leunyab Lam Rateb
Wafeut Lam Saket Pujoe Rabbana
Wafeut Lam Zikir Kalimah Iman
Hasan Ngoen Husein Reubah Mandua
Hasan Ngoen Husein Makeen Lom Teumoe
Di Ali Laju Neubaca Do’a
Inna lillahi Wainna ilaihi Raji’un
Aneuk Mantoeng Cuet Poema Ka Neuwoe
Aduen Ngoen Adoe That Meugrak Rasa
O’eh Teulheuh Wafeut Siti Fatimah
Hana Neupeugah Bak Ureung Lingka
Hana Neubri Thee Bak Ureung Nanggroe
Ubak Kaoem Droe Tan Geubri Haba
Hana Meusaboeh Yang Teuka Keunan
Chiet Lhee Digoeb Nyan Deungoen Aneuk Da
Hasan Ngoen Husein Mantoeng Lam Teumoe
Di Ali Sidroe Sampoeh Ie Mata
Ali Neumariet Ka Putoeh Bak Moe
Wahee Aneuk Droe Geutanyoe Saba
Jinoe ee Aneuk Laen Tan Sidroe
Chiet Lhee Geutanyoe Dirumoh Tinggai
Bak Ureung Laen Singoeh Ta Peuthee
Geutanyoe Ban Lhee Peu Manoe Bunda
Bah Lee Ee Aneuk Tajak Seumanoe
Pakriban Bunoe Wasiet Bak Gata
Uloen Peumanoe Gata Peu Suci
Aneuk Jinoe Lee Beudoeh Mandua
Masa Mantoeng Droe Di Rasulullah
Pih Kaneupeugah Wafeut Mak Gata
Han Geubri Peutrep Yue Tanoem Bagah
Lage Amanah Han Loen Jeut Tuka
Teuma Lee Laju Dum Pue Ka Keumah
Neucoek Jeunazah Fatimah Zuhra
Alat Ngoen Kafan Chiet Na Dirumoeh
Hana Lee Mehmoeh Ali Neumita
Hasan Ngoen Husein Ali Peugah Krie
Goebnyan Neu Plee Ie Aneuk Uet Dua
Hasan Ngoen Husein Dua Peusuci
Geupeutroeh Dum ie Jeut-Jeut Bule Roma
O’eh Lheuh Peumanoe Ngoen Ie Sembahyang
Peuduk Lam Kafan Bungoeng Syuruga
Geuboeh Ngoen Bajee Geuplee Bebewan
Neuikat Kafan Limoeng Boeh Punca
Alamat Tanda Ureung Iseulam
Isyarah Keunan Bak Asai Mula
Ali Sembahyang Ateuh Jeunazah
Goebnyan Kasusah Hana Jeut Geuba
Ngoen Tiba-Tiba Teukeudi Tuhan
Nibak Malam Nyan Teuka Abizar
Abizar Kasat Neujak Bak Ali
Ka Padum Lawi Meureumpoek Hana
Abizar Pih Troek Neukeutok Pinto
Ali Neutajoe Laju Neu Buka
Abizar Tamoeng Neunging Jeunazah
Ali Neupeugah Fatimah Zuhra
Abizar Tahee Ka Teudoeng Nafah
Sebab Tan Meugah Khabar U Luwa
Hana So Tupu Wafeut Fatimah
Abizar Tijoeh Deungoen Ie Mata
Abizar Tanyoeng Pakoen Lagee nyoe
Bak Ureung Nanggroe Tan Sapu Khabar
Ali Neujaweub Loen Pubut Meuno
Seubab Lagee Nyoe Wasiet Maulana
Han Geubri Peutreb Lee Rasulullah
Wafeut Fatimah Yue Tanoem Sigra
Deungoen Seubab Nyan Uloen Peubagah
Ngoen Rasulullah Bek Temeureuka
Bukoen Uloen Soem Wafeut Fatimah
Singoeh Loen Peugah Wahee Abizar
Wahee Abizar Kajeut Sembahyang
Bek Lewat Malam Kubu Tabuka
Abizar Teuma Laju Sembahyang
O’eh Teulheuh Salam Neubaca Do’a
Teuma Lee Laju Neucoek Jeunazah
Hingga Kaleupah Bak Kubu Neuba
Hana Meusidroe Meurumpoek Ureung
Di Dalam Buleun Bandrang Cuaca
O’eh Ban Sare Troeh Bak Teumpat Kubu
Geupeuduk Laju Bungoeng Jroeh Rupa
Geubuka Uruek Ngoen Sigra Laju
Dalam Buleun Hu Bandrang Cuaca
Abizar Neudoeng Di Dalam Kubu
Neupeugleh Laju Ban-Ban Silingka
O’h Lheuh Seuleusoe Neupeujroeh Kubu
Abizar Laju Kalam Neubuka
Abizar Neudoeng Di Dalam Kubu
Neumariet Laju Salam Neumula
Wahee Hai Kubu Gata Ka Teuhah
Kehendak Allah Katroek Kutika
Keunoe Bak Gata Kamoe Jak Keubah
Jeunazah Fatimah Aneuk Maulana
Keunoe Bak Gata Kamoe Jak Seurah
Geunaseh Allah Bungoeng Syuruga
Tapapah Beujroeh Si Payoeng Buju
Aruwah Ibu Mukmin Lam Doenya
Aneuk Di Nabi Nyan Rasulullah
Malam Nyoe Meuseurah Keunoe Bak Gata
Ibunda Dua Hasan Ngoen Husein
Yang Kamoe Meusyen Bak Gata Loen Ba
Nyoe Keuh Di Judoe Sayyidina Ali
Uloen Peuturi Kubu Bak Gata
Nyoe Keuh Ureung Sabee Lam Rateb
Seulama Hudep Tip-Tip Kutika
Nyoe Keuh Ureung Jroeh Dalam Ibadat
Kamoe Jak Intat Keunoe Bak Gata
Nyoe Keuh Ureung Geunaseh Allah
Jinoe Loen Keubah Kubu Bak Gata
Kubu Lee Teuma Laju Dipeugah
Ngoen Izin Allah Bak Manusia
Wahee Abizar Tan Kamoe Turie
Aneuk Di Nabi Fatimah Zuhra
Hana Loen Turi Geunaseh Allah
Hana Loen Papah Bungoeng Syuruga
Hana Loen Turie Ma Hasan Husein
Yang Gata Meusyen Dimuka Doenya
Hana Loen Turie Judoe Pahlawan
Hana Loen Tuban Aneuk Maulana
Hana Loen Turie Ureung Ibadat
Takeubah Leugat Jeut Ta Weh Gata
Wahee Abizar Hana Peu Tapeugah
Hana Peu Takisah Asoe Syuruga
Hana Peureule Lagee Tapeugah
Kajeut Takeubah Tajak Weh Gata
Kamoe Meukeusud Hate Yang Tabah
Yang Gata Peugah Hana Meuguna
Kamoe Meukaloen Asoe Lam Hatee
Mukmin Bak Hatee Yang Kamoe Mita
Yang Na Seulamat Iman Lam Hatee
Bak Sukreut Matee Bunoe Peu Jiba
Peu Na Jiseuboet Zikir Keu Allah
Watee Pinjaman Malaikat Ba
Kamoe Meusuka Keu Hamba Allah
Teoh-teoh Meutuwah Hate Lam Dada
Teoh-teoh Yang Ingat kepada Tuhan
Laen Nibak Nyan Hana Pue calitra
Yang Koen Bak Seukreut Seulamat Iman
Hana Pue Takheun Ban Wahee Abizar
Kamoe Meukalen Hatee Yang Salim
Laen Nibak Nyan Keuno Bek Taba
Abizar Deungoe Jawaban Kubu
Gob Nyan Ka Ngilu Jeut-Jeut Anggota
Neucok Jeunazah Peutreon Lam Kubu
Neu Tanoem Laju Sajan Ngoen Doa
O’eh Lheuh Peu Kubu Siti Fatimah
Neu Beudoeh Bagah Laju Jak Gisa
O’eh Beungoeh Uroe Laju Lee Meugah
Ureung Madinah Hate Dum Duka
O’eh Ban Hana Lee Siti Fatimah
Nanggroe Madinah Tan Lee Cuaca
Tuha Ngoen Muda Kaleukang Hatee
Geudeunge Tan Lee Fatimah Zuhra
Tuha Ngoen Muda Mandum Ka Geutroen
Geujak Keumunjoeng Agam Ngoen Dara
Agam Ngoen Inoeng Meusahoe Keunan
Geutanyoeng Yoeh Nyan Jeunazah Hoe Ka
Sayyidina Ali Neubri Jawaban
Ka Lheuh Loen Tanoem Beuklam Kajula
O’eh Ban Geudeunge Ka Lheuh Geutanoem
Mandum Geujak Rhoem Ali Murtadha
Inoeng Ngoen Agam Beungeh Keu Ali
Pakoen Tan Geubrie Meusikrak Haba
Ureung Madinah Beungeh Hana Ban
Seubab Lagee Nyan Ali Murtadha
Pakoen Ka Geusoem Wafeut Fatimah
Mandum Sang Beukah Hate Lam Dada
Ureung Madinah Beungeh Keu Ali
Seubab Tan Geubri Peuleumah Rupa
Masa Mantoeng Droe Di Rasulullah
Ka Lheuh Neu Peugah Bak Kamoe Dum Na
Watee Jan Wafeut Siti Fatimah
Di Uroe Singoeh Di Likoet Hamba
Soe Yang Seumbahyang Ateuh Jeunazah
Loen Angkee Beusah Tamoeng Syuruga
Mandum Neu Angkee Oleh Janjongan
Deungoen Seubab Nyan Dum Beungeh Raya
Di Ali Pih Lom Gob Nyan Peubagah
Bak Rasulullah Wasiet Loen Kana
Jan Wafeut Siti Geuyue Peubagah
Su Uem Bek Gadoeh Nibak Anggota
Nibak Uroe Nyan Karap Jeut Pakee
Beungeeh Keu Ali Tuha Ngoen Muda
Geutamoeng Yang Tuha Ngoen Sigra Rijang
Bek Roeh Jeut Lawan Ali Murtadha
Ali Ka Beungeh Juwah Hana Ban
Teuploeh Suruban Hana Geukira
Peudamee Keunoe Peudamee Keudeeh
Meu’ah Dum Habeh Meujroeh-Jroeh Teuma
Geutamoeng Yang Tuha Nibak Watee Nyan
Mandua Timang Ka Seungap Haba
Teuduek Kisah Nyoe Dilee Sikeujab
Uloen Riwayat Ali Murtadha
O’eh Lheuh Neutanoem Siti Fatimah
Bak Ali Leumah Saboeh Bicara
Neupeuget Laen Saboeh Lom Kubu
Saban That Buhu Sangoeh Bandua
O’eh Lheuh Neu Peuget Laju Lee Geuwoe
Abizar Bunoe Ka Trep Neugisa
Kubu Dua Boeh Saboeh Tan Asoe
Jarak Hana Toe Antara Dua
Hana Soe Tuo’eh Hikmah Di Gobnyan
Pakoen Lagee Nyan Hantroeh Soe Duga
Hana Soe Tukrie Tujuan Gobnyan
Keudeeh Khabaran Ta Samboeng Teuma
Ureung Dum Bunoe Karap Jeut Pakee
Ka Jroeh Dum Saree Lheuh Tamoeng Tuha
Geubeudeh Si Droe Yang Ulee Kawan
Geutanyoeng Rijang Wahee Murtadha
Wahee Ya Ali Jinoe Ta Peugah
Siti Fatimah Tan Meungieng Rupa
Ka Lheueh Neu Tanoem Beuklam Neupeugah
Deukat Daerah Kubu Neubuka
Dipat Neutanoem Siti Fatimah
Tuloeng Peuleumah Bak Kamoe Dum Na
Tan Meungieng Ureung Kamoe Ngieng Kubu
Peuleumah Laju Wahee Murtadha
Ali Neu Jaweub Uloen Peuleumah
Hana Peusalah Jinoe Uloen Ba
Sayyidina Ali Ka Geugrak Beurangkat
Laen Dum Setoet Tuha Ngoen Muda
O’eh Ban Saree Troeh Bak Lampoeh Kubu
Peuleumah Laju Sagoe Mandua
Ali Peuleumah Kubu Dua Boeh
Lam Dua Saboeh Asoe Jih Hana
Dalam Dua Nyan Saboeh Meu Asoe
Tapileeh Keudroe Antara Dua
Teuma Geujaweeb Lee Ule Kawan
Pakoen Lagee Nyan Wahee Murtadha
Yang Toeh Yang Siri Kubu Fatimah
Keupue Neupeugah Di Dalam Dua
Kubu Geupeugoet Hana Meusapat
O’eh Geungieng Jeurat Saban Mandua
Geutanyoeng-Tanyoeng Hana Geupeugah
Sabee Di Babah Antara Dua
Hana Soe Turie Yang Toeh Meu Asoe
Harum Bukoen Lee Antara Dua
Bee Minyeuk Ata Deungoen keutanggi
Mandua Saree Geu Lhoem Bak Jeumpa
Ureung Yang Seutoet Sayang Bukoen Lee
Meumet-Met Hate Tuha Ngoen Muda
Ureung Madinah Geumoe Meuree-Ree
Yang Toeh Yang Teuntee Geuturie Hana
Han Geujeut Desak Sayidina Ali
Takoet Geuhila Hana Soe Bela
Peurumoeh Digoeb Hukoem Pih Digoeb
Pakoen Geutanyoe Ta Peu Hu Mata
O’eh Lheuh Dum Kaloen Kubu Fatimah
Geuwoe Lee Bagah Tuha Ngoen Muda
Hingga Ka Habeh Mandum Ka Geuwoe
Seungap Lam Nanggroe Seungue Buken Lee
Ureung Lam Nanggroe Teu Tahe-Tahe
Seubab Bintang Hu Hana Lee Rupa
Dum Ureung Inoeng Teu Tajoe-Tajoe
Tan Meuri Kubu Fatimah Zuhra
Seubab Buet Ali Pahlawan Meugah
Goebnyan That Leupah Geusom Rahsia
Ureung Ziarah Dijeut-Jeut Nanggroe
Geujak Dua Hoe Dalam Calitra
Ureung Jak Kunjoeng Keudeoh Ngoen Keunoe
Bah Ureung Nanggroe Bah Ureung Luwa
Hasan Ngoen Husein Tapiyoeh Kisah
Ali Yang Meugah Piyoeh Calitra
Wahee Syedara Muslimin-Muslimat
Ummat Muhammad Mandum Sinana
Calitra Wafeut Siti Fatimah
Soe-Soe Yang Peugah Raya That Pahla
Tanda Jih Kawan Sajan Fatimah
Soe-Soe Meutuwah Meuteumee Baca
Atau Jideungoe Goeb Peugah-Peugah
Bandua Surah Geutanyoe Bak Na
Soe-Soe Na Keubah Calitra Lagee Nyoe
Bah Teuduek Keudroe Meuteumeung Pahla
Wahee Saudara Mandum Yang Deungoe
Pakriban Bunoe Kubu Ceulitra
Seudang Fatimah Ureung Ka Teuntee
Yang Tamoeng Dilee Dalam Syuruga
Ek jeut Lagee Nyan Kubu Tan Malee
Aneuk Pang Ulee Hana Ji Taba
Mandum Geutanyoe Ka Habeh Lagee
Han Meupat Teuntee Mandum Anggota
Meu Kameupaloe Bunoe Bak Sukreut
Laju Meusangkoet Hana Lee Guna
O’eh Troeh Bak Kubu Laju Meupalet
Menyoe Lam Sukreut Ka Lee Binasa
Ka Leumoeh Iman Dalam Jantoeng Sir
Diwatee Matee Sinan Bek Cidra
Baroe Seulamat Iman Meusampee
Didalam Hate Allah Ji Baca
Menyoe Koen Meunan Lam Sukreut Matee
Ka Keuh Lam Kafee Habeh Keunira
Di Phoen Bak Kubu Laju Mudharat
Hana Lee Ubat Laju Nuraka
Kafee Iseulam Disinan Teumpat
Bak Pintoe Sukreut Surga Nuraka
Diwatee Sukreut Sinan Ka Leupah
Ngoen Kubu Pih Glah Tan Sapu Mara
Dipadang Mahsyar Hana Lee Susah
Sajan Fatimah Yup Payoeng Raya
Fatimah Lambai Ureung Meu Iman
Piyoeh Dalam Nyan Meusuka Ria
Tan Lee Geuhisab Bak Ulee Titie
Neuba Lee Nabi Ateuh Nuraka
Keudeh Peuniyoeh Bak Kulam Nabi
Sapat Ngoen Siti Kawoem Wanita
Wahee Syedara Kawoem Muslimin
Sayyidil Mursalin Neupreh Di Mahsyar
Wahee Syedara Kawoem Muslimat
Aneuk Muhammad Neupreh Di Mahsyar
Ta Seutoet Goebnyan Jalan ‘Ibadat
Bak Koeng Ta Mumat Bak Ujoeng Punca
Wahee Saudara Ingat Keu Untoeng
Bak Uroe Langsoeng Kubu Ngoen Gata
Soal Lam Kubu Ken Bacut-Bacut
Bak Nyawoeng Teusuet Meuribee Bala
O’eh Troeh Bak Kubu Laju Ka Bulut
Ta Ingat Bacut Keunan Ta Gisa
Neutueng Saudara Nasehat Bunoe
Pakriban Bunoe Kubu Meu khabar
Sedang Fatimah Ureung Ka Teunte
Yang Tamoeng Dilee Dalam Syuruga
Meugohlom Tamoeng Siti Fatimah
Laen Goeh Keumah Kawom Wanita
Wahee Saudara Bek Beh-Beh Lagee
Ji Preh Lee Kubu Tuha Ngoen Muda
Teungoeh Na Watee Yoeh Goh Lam Kubu
Ta Pubut Laju Suroeh Rabbana
Tuhan Neusuroeh Akhirat Mantoeng
Hana Geuyu Doeng Tatuntoet Doenya
Sikureung-Kureung Bak Na Dua Hoe
Doenya Ta Hiroe Akhirat Bak Na
Geutanyoe Awam Dumnan Bek Rugoe
Tuntoet Dua Hoe Akhirat Bak Na
Bukoen Lee Sayang Nabi Muhammad
Bak Neupreh Ummat Dipadang Mahsyar
Rupa Meubalek Koen Lee Ban Insan
Pakoen Lagenyan Syariat Hana
Aneuk Ngoen Nabi Teupileh Ummat
Watee Ta Ingat Tijoeh Ie Mata
Tujoeh Ploeh Lhee Shaf Ummat Muhammad
Yang Na Seulamat Syit Saboeh Saja
Tujoeh Ploeh Dua Mandum Lam Sisat
Yang Jeut Keu Ummat Syiet Saboeh Saja
Aneuk Ngoen Nabi Ie Mata Tijoeh
Ummat Dum Gadeoh O’eh Troeh U Mahsyar
Meu O’eh Ta Pikee Utak Teu Reulhoeh
Saleh Soe Gadoeh Watee Neu Mita
Soe-Soe Seulamat Dilee Bak Sukreut
Yang Keuh Neuseutoet Laen Kahana
Watee Ta Ingat Jeut Rusak Hate
Wate Ta Rawi Reuloeh Bicara
Ee Ya Tuhanku Berkah Nabi Muhammad
Neubrie Seulamat Kamoe Semua
Deungoen Bereukat Mu’jizat Nabi
Kamoe Bek Neubrie Gadoeh Di Mahsyar
Deungoen Bereukat Siti Fatimah
Bek Keunoeng Timah Jipoh Le Hawa
Bek Neubri Kamoe Jipoh Le Nafsu
Bereukat Ibu Mukminin Sidumna
Deungoen Bereukat Siti Fatimah
Iman Bek Leumoeh Di Dalam Dada
Pakriban Mangat Sukreut Di Goeb Nyan
Neubri Bak Meunan Keu Kamoe Dumna
Neubri Meusahoe Kamoe Ngoen Goebnyan
Kamoe Yang Inoeng Keunan Meuteuka
Di Ureung Agam Sajan Ngoen Nabi
Ngoen Tuan Siti Fatimah Zuhra
Alhamdulillah Loen Pujoe Rabbi
Nikmat Goeb Nyan Brie Keu Uloen Neubuka
Soe–Soe Yang Deungoe Bak Gaseh Hate
Keupada Siti Fatimah Zuhra
Beu Ek Teu Ingat Pesan Di Goebnyan
Inoeng Ngoen Agam Bek Dok Ngoen Doenya
Donya Nyoe Geubri Teumpat Ujian
Soe-Soe Koeng Iman Keujih Bahgia
Doenya Geupulang Keu Ureung Kafee
Di Jieh hana Lee Geubi Syuruga
Peu-Peu Ji Pubut Geutham Hana Lee
Keu Jih Geu Peu Pree Nikmat Lam Doenya
Keu Ureung Mukmin Teumpat Ujian
Iseulam Iman Sinan Meurupa
Keu Ureung Mukmin Gampoeng Susahan
Bukoen Disinan Peu Punoeh Hawa
Keudeh Gampoeng Jeh Bak Meuthak Meutham
Bak Donya Taulan Teumpat Goh Hawa
Bek Rhoeh Ta Reupah Nikmat Si Kafee
Di Jih Hana Lee Kasep Lam Doenya
Meunyee Ta Seunoeh Aliran Kafee
Umi Teukeusee Ka Salah Raba
Seumbahyang Hana Puasa Pih Tan
Seupoe Pakaian Tacuba Kira
Buet Yang Maksiet Peu-Peu Yang Geutham
Koen Hak Iseulam Kafee Poe Jumba
Bek Tajak Reupah Peunajoeh Kafee
Ta Peutheun Hate Deungoen Anggota
Doenya Titipan Bagi Si mukmin
Hana Pat Meu'en Meu Ubee Seuma
Di Ureung Kafee Sinoe Bak Meue’n
Di Ureung Mukmin Akhirat Teuma
Keudeh Ka Teumpat Peupunoeh Nafsi
Jeut Pubut Laju Krie-Krie Yang Suka
Doenya Nyoe Teumpat Bagi Si Kafee
Disideh Nanggroe Teumpat Seunangan
Hana Lee Geutham Peu-Peu Ta Hawa
Keudeh Keuh Teumpat Bak Meukhem-Meukhak
Hoe-Hoe Yang Tajak Ngoen Aneuk Dara
Taduek Lam Kendran Hoe-Hoe Yang Tajak
Meugalak-Galak Ngoen Sabee Muda
Luah Syuruga Sidroe-Droe Sapoe
Ubee Donya Nyoe Lampoeh Syuruga
Dalam Syuruga Hana Lee Kakoeh
Hana Teumpat Toeh Dua Peukara
Dalam Syuruga Makanan Haloeh
Mandum Jeut Reu Oeh Bhee Minyeuk Ata
Taduek Lam Doenya Ta Pajoeh Ngoen Toeh
Najis Lam Tuboeh Sabee Ta Ba Ba
Ta Lakee Bak Poe Uroe Ngoen Malam
Bak Gampoeng Adam Beutroeh Ta Gisa
Ubak Nanggroe Baqa Keudeh Ta Ulang
Bak Gampoeng Adam Ngoen Siti Hawa
Keudeh Gampoeng Jeh Ureung Yang Taat
Ureung Ibadat Masa Lam Doenya
O’eh Noe Keuh Dilee Habeh Riwayat
Ee Rakan Sahbat Tuha Ngoen Muda
Dilikoet Bak Nyoe Dang –Dang Loen Surat
Sajan Loen Surat Jibrail Teuka
Kisah Jibrail Geutroen U Bumoe
Geucoek Lam Bumoe Siploeh Peukara
Keuneubah Jameun Uloen Peusapat
Haloeh Sinurat Uloen Peuraya
Ramee Dum Lakee Bak Rayeuk Harah
Uloen Sila’ah Sem-Sem Sibanja
Kisah Yoeh Lahee Nabi Muhammad
Pih Ka Syit Tamat Loen Salen Banja
Kisah Fatimah Mariet Ngoen Peudeung
Atra Nyan Mandum Kalheuh Loen Pareksa
Mudah-Mudahan Mangat Bak Geu Kheun
Beuthat Khat Diloen Payah Goeb Baca
Assalamua’laikum Kawom Meutuwah
Isya Allah Ta Samboeng Teuma