Lirik Syair Aceh, Sedih, Lucu dan Juga Penuh dengan Nasehat

Kumpulan Lirik Syair Aceh, Sedih, Lucu dan Juga Penuh dengan Nasehat.
Berikut ini Lirik Syair Aceh, Sedih, Lucu dan Juga Penuh dengan Nasehat dari Nanggroe Aceh Darussalam.

NARIT PEU INGAT

Menyo geutanyo eleumee kureung
Tamse pheut tumpoi mata
Brat ta seukok beukah ulee
Meunyo kreuh kayee patah mata

Bahthat pih tameh sarang sareng
Asai puteng jilop lam bara
Nibak tamupake got tameujroh
Tameu saboh dingon syedara

Bak jak bak jareung-jareung
Watee ta bileung beuteupat banja
Bak duek bak dong beu sapue pakat
Sang seuneusap meu adoe a

Teulah sithon di ureung meugoe
Telah si uroe ureung maurusa
Bak tajak boh meuh terupah beusoe
Oh akhe dudoe taro ie mata

Toi dingon rak bak rakyat nanggroe
Tameh ngon bajoe bak ureung tuha
Gaseue ngon bubong ka nibak Sultan
Papeun ngon labang nibak ulama

Boh labu ie kuwah lada
Croh keu bada pisang abee
Narit mameh bek ta peucaya
Akhe masa tanyoe jitipee

Peureulee langai watee mu ue blang
Peurelee eumpang watee boh pade
Peurelee teuntra nanggroe teungoh prang
Peurelee rakan watee meupake

Bek seumayang watee ciret
Merateb watee geumpa
Saket ek mite uteun
Seupot buleun mita suwa

Bek ie raya bek tathen ampeh
Bak ie tireh bek tatheun bubee
Bek tameurakan dingon sipaleh
Hareuta teuh habeh geutanyoe malee

NARIT SEUMAPA

Assalamu'alaikum syedara meutuah
Ngon ridha Allah neu ampon doesa
Bandum geutanyo didalam fitrah
Rahmat baraqah buleun puasa

Doa ta lakee nibak poto Allah
Aceh meutuwah rakyat bahagia
Nanggroe beu makmu ureung beu carong
Agama beukong damee seujahtera

Meutuwah tapak tajak bak titi
Metuwah gaki tamong syuruga
Meutuwah jaroe tem meuseudeuqah
Metuwah lidah yang tem puasa

Kadang nagasa bak lon meututo
Kadang meutajo bak lon meucakra
Kadang na janji gohlom lon peuglah
Silap ngon salah bak lon meuseunda

Aleh tan lon ngieng watee neu tawok
Hana lon su ot watee neu sapa
Nibak uroe nyoe lakee meuah
Bak po teuh Allah beu ampon doesa

Geudham geudhum geulanteue digle
Kilat dum bla ble sang peungeuh donyo
Ta ibadat tan eleumee hana meuhase
Di uroe page dalam nuraka

Kumpulan Lirik Syair Aceh, Sedih, Lucu dan Juga Penuh dengan Nasehat

Endatu geutanyo ureung meutuwah
Aneuk geupegah jalan agama
Mulayi lam ayon geupeuturi Allah
Sampoe abeh langkah didalam donya

Dingon rateb aneuk geu hayon
Aneuk teumuron geu wasiet teuma
Poma peurateb watee mantong cut
Rayek neujok beuet dingon sikula

Lailahaillallah kalimah thaibah beukai ta mate
Beukayem takhuen kalimat thaibah Allah peuleupah oh watee mate
Kareuna mate hana teuntee jan
Lam hukum tuhan nyawong geupeure

Ji teubit nyawong saket teu that-that
Tuleng ngon urat sang habeh crebre
Lailahaillallah kalimah thaibah keu ubat hatee
Beule takhuen kalimah thaibah han susah watee ta mate